Култура

Продуцентот Стив Абот, вечерва на Синедејс, ќе прими награда за долгогодишното посветено работење на Монти Пајтон

На вечерашната проекција на филмот „Meaning of life“ во 21 часот во кино Фросина, ќе присуствува и продуцентот Стив Абот и ќе му биде доделена наградата за Долгогодишното посветено работење на Монти Пајтон. Наградата ќе ја врачи амбасадорката на Обединетото Кралство на Велика Британија и Северна Ирска, Рејчел Галовеј.
Проекцијата е бесплатна и отворена за сите љубители на филмот.

Инаку, вечерва, на програмата на 18. издание на Синедејс ќе биде прикажан филмот на Вуди Ален, „Дождлив ден во Њујорк“ во 20 часот во киното Милениум.  Станува збор за романтична комедија за двајца студенти, Гетсби и Ешли, чијшто викенд во Њујорк воопшто нема да се одвива според планот. Дождот ќе подготви низа неочекувани средби и забавни авантури за обајцата. По овој филм,во 22 часот ќр биде прикаан филмот „Пијавици“  во режија на Драган Маринковиќ. Филмот го опфаќа периодот меѓу 1996 и 2000 година, односно четири од десетината ужасни години за Србија на крајот на дваесеттиот век.

Главниот лик е писателот Петар Мириќ, човек чиишто идеали за слобода, чесност, моралност и правдина, значително се разликуваат од начинот на живот во Србија под Милошевиќ. Своите ставови за разни настани тој ги изразува јавно како коментари на локална телевизија. Добива сериозни закани и понуди од полицискиот безбедносен сектор, но одбива да соработува. Филмот ја прикажува неговата борба против обесправеноста и автократијата, кои за жал повторно воскреснуваат во денешна Србија. Во истото кино во 15 часот е закажана решризата од синоќешната проекција на романскиот филм „Свиркачите“ во режија на Корнелиу Порумбоиу. Кристи, романски полицаец, кој е свиркач за мафијата, ќе оди на островот Ла Гомера за да научи древен свиркачки јазик. Во Романија е под постојан полициски надзор и со помош на овој кодиран јазик ќе може да продолжи да комуницира со мафијашите за да го извлече Золт од затвор. Золт е единствениот што знае каде се скриени триесетте милиони евра. Во 17.30 е закажана репризата на филмот на Џим Џармуш, Мртвите не умираат“. Нешто не е во ред во заспаното гратче Центервил. Месечината е огромна и спуштена многу ниско, часовите на денот стануваат непредвидливи, а животните почнуваат да покажуваат необично однесување. Вестите од градот се страшни и научниците се загрижени, но никој не ја предвидува најчудната и најопасна реперкусија што наскоро ќе почне да го вознемирува Центервил: мртвите стануваат од гробовите и почнуваат да се хранат со живите, а граѓаните се принудени да се борат за да преживеат.

Во киното Фросина во 19 чссот ќер биде прикажан косовскиот филм на Лендита Зекурај, „Куќата на ага“. Емотивен приказ на животите на пет жени низ очите на деветгодишно момче, кое трага по неговиот исчезнат татко. Деветгодишниот Ага живее со мајка му и четири други жени на зафрленa планинска локација во Косово. Ага се обидува да заработи со продажба на цигари, но главна цел му е да продолжи да го бара исчезнатиот татко. Единствената машка фигура во неговиот живот е Цера, кој е брутален и суров и покрај тоа што го варди Ага, кој е премногу млад за да разбере зошто живее на таква локација само со жени. Кога наеднаш излегува еден неочекуван итен случај, Ага е приморан да помогне и тоа доведува до низа настани што ќе му ја разоткријат вистината. Пред овој филм ќе биде прикажан краткиот македонски филм на Сергеј Сарчевски „Што крие додот“. 

По преселбата во странство, надежен студент се соочува со осаменост и со предизвикот да се снајде емотивно и професионално во една голема светска метропола, при тоа да ги исполни, како своите, така и очекувањата на околината.Во 21 часот ќе биде прикажан филмот „Смислата на животот“ што спаѓа во програмата за одбележување на 50 годишнината од оформувањероо на тимот на Монти Пајтон. 

 

 

„Смислата на животот“ е скеч-филм поврзан како студија за опасноста и апсурдноста на човековото постоење – опис што не опишува доволно колку филмот е всушност смешен. Во него има крв, секс и насилство, како и едни од најдобрите реплики од сите досегашни нивни дела на тема раѓање, смрт и сите здодевни работи во текот на животот помеѓу. Визуелно доаѓа како мешавина на Федерико Фелини, Ингмар Бергман и Базби Беркли, со проектили од повраќање! Но суштинската порака на филмот е едноставна и убава: Сите ние сме родени чуда и зошто да не бидеме добри со сите останати родени чуда. Во џебното кино при Младинскиот културен центар, во 19 часот ќе бидат прикажани филмови од студентската програма, а во 22 часот, ќе биде прикажан филмот „Електричен оргазам за идните генерации“ во режија на Марија Вукиќ од програмата на музички  документарни филмови. 

 

 

Следејќи го бендот Електрични оргазам на нивната прекуокеанска турнеја во летото 2018 година, сликаме портрет на еден од најпопуларните и најдолговечни рок бендови на просторите на поранешна Југославија, откривајќи интересни и малку познати детали од нивната 39-годишна кариера, и сето тоа директно од сеќавањата на самите членови на бендот.

Во 21:30 часот во МКЦ ќе се одри промоција на книгата од Борислав Пешиќ Благоја, „Long play – zabeleške u vremenu“ е фотомонографија, која содржи 1332 портрети на 333 регионални музичари што твореле во периодот помеѓу 1950-2000 година. Жанровски најзастапени се рок музичарите, а на страниците на книгата ќе ги препознаете и великаните на поп музиката од овој регион, како и некои снажни ликови од џез и блуз сцената. Книгата е во формат на грамофонска плоча во ексклузивно пакување со кутија. Печатена е на три вида хартија во две различни техники и треба да се најде на колекционерските полици опкружена со музика од плочите на уметниците опфатени во неа. На речиси 400 страници може да прочитате и биографии со интересни „цртички од животот“ на музичарите со кои растеле генерациите од регионов. За на крај , со почеток во 23 часот, ќе настапи германскиот инди-рок бенд, Thе NOTWIST. Основан во 1989 година, бендот поминува низ неколку музички инкарнации, притоа успевајќи да одржи релативно стабилна постава. Додека раните албуми им се движат од хеви метал до дарк инди-рок, поновите изданија со кои привлекуваат најмногу внимание се главно под влијание на електронската сцена, како и другите изведувачи на продуцентската куќа Morr Music.

 

Напишете коментар

Вашата е-пошта адреса нема да биде прикажана во коментарите. Задолжителните полиња се означени со *