Култура

Со премиерни изведби на „Херои 4:33“ завршува 45. МОТ

Премиерните изведби на „Херои 4:33“ на Деан Дамјановски, вечер и утре, ќе го затворат годинешното 45. издание на Млад отворен театар (МОТ). Премиерно на МОТ „Херои 4:33“ е галериска театарска инсталација, мултимедијален перформанс изведен од тeатар „Ј. Хаџи-Константинов“ – Велес. Три простории, три инсталации, три сцени. Во секоја од трите по еден гледач. Секоја трае 4:33, колку што трае композицијата на Џон Кејџ.

Деан Дамјановски (фото Зденко Петровски)

– Проектот „Херои 4:33“ всушност е своевидно продолжение на еден друг проект „Тој и Таа“ кој го работевме со Велешкиот театар ова лето и кој беше фокусиран на користењето на интернет технологијата во театарот. Проектот се состоеше од 12 интернет епизоди од материјали снимени од актерите, дома и потоа монтирани – сето тоа без никаква физичка интеракција меѓу учесниците, односно, без „физичко присуство“. Токму овој концепт за „присуство/отсуство“ кој е заложен во основата на театарот како медиум е основата за оваа театарска инсталација наречена „Херои 4:33“, вели Дамјановски.

– Истражувањето на врската на „присуството/отсуството“ карактеристично за театарот како медиум се изведува преку употребата на различни медиуми во три специфични простори, изолирани едни од други. Гледачите, соодветно заштитени и водени еден по еден, како низ музеј, ќе бидат запознаени со нашите „експонати“, последните преживеани, пионерите на „новата реалност“. Стварноста што ќе биде претставена во секој од просторите, наликува на своевидна дистописка стварност, во која човештината отстапува пред сопствената опачина. Целото доживување, кое гледачот го има од инсталацијата, наликува на оние секунди пред почетокот на претставата, кога светлата во салонот ќе се изгаснат, а претставата сѐ уште не започнала, кога стварноста околу нас отсуствува, а сценската сѐ уште не се појавила. Просторот, костимите и музиката се во функција на доживувањето од овој меѓу момент на „присуство/отсуство“, кое трае нешто повеќе од 13 минути, појаснуваат од МКЦ.

Автор:

Слични статии