Култура

Стартува 41. Скопски џез фестивал со музичари од три континенти

Десет групи од три континенти ќе настапат на 41. издание на Скопскиот џез фестивал, што се отвора утревечер. Концертите ќе се одржуваат во Национална опера и балет и Младински културен центар.

Julien Desprez

„Програмата распоредена во четири вечери е извонредно силна, разновидна и исполнета со ексклузивни настапи на некои од најголемите имиња на современиот џез и на креативната музика денес“, најавуваат организаторите.

Честа да го отвори фестивалот му припадна на американскиот ансамбл „Експлодинг стар оркестра“, предводен од авангардниот трубач Роб Мазурек, по што ќе следи концертот на македонското инструментално трио „Зулу 3.4“.

 Taxi Consilium

Во останатите три дена, на Скопскиот џез фестивал ќе свират музичари од САД, Франција, Бразил, Шведска и Норвешка, а домашната џез сцена, покрај „Зулу 3.4“, ќе ја претставува и „Такси конзилиум“. Роб Мазурек ќе има уште еден настап на 41. СЏФ, што е најавен како светска премиера на неговиот нов проект „Њу фјучр сити радио“.

Во рамките на фестивалот ќе се прикаже и музичкиот филм „Summer of Soul (…Or, When the Revolution Could Not Be Televised)“, кој годинава освои Оскар за најдобар документарец.